علبة شوكولاتة: العلبة اتفتحت

اهلاً بيكم فى علبتى المتواضعة، انا انديرا و دى خامس محاولة ليا انى اعمل بلوج، كل مرة ببدأ بلوج بحماس بس دايماً ببطل أكتب و معرفش ايه السر، فى وجهة نظر بتقول ان مشكلتى مشكلة لغوية (أو فى مصادر أخرى: مشكلة هوية)، أصل أنا سودانية بس بقالى 13 سنة عايشة فى مصر و قبلهم 3 سنين فى المغرب و طول حياتى كنت بتكلم فى البيت سودانى و فى الشارع مصرى و مع الجيران مغربى (الموضوع طويل) دة غير انى بفكر بالانجليزى (دة موضوع أطول) فكل لما اجى اكتب بحتار، لو كتبت بالسودانى محدش من صحابى حيفهمنى و بما ان قرائى الوحيدين هما صحابى فمحدش حيفهمنى و مش حيبقى للبلوج فايدة، أما لو كتبت بالمصرى أخويا هيرخم عليا و يقولى انى نسيت أصلى أما المغربى فأنا نسيتو من زمان و لو كتبت بالانجليزى هيقولو انى عاملة فيها البت الخواجاية دة غير ان فى حاجات كتير ما ينفعش تتقال غير بالبلدى، دى كانت باختصار وجهة النظر اللى بتقول ان مشكلتى لغوية.
فى وجهة نظر تانية بتقول انى مشكلتى نفسية، اولاً احساس انى الكلام الى بكتبوا فى ناس تانية حتقراه بيخلينى احاسب على كلامى و احاول اطلعو مظبوط و جميل رغم ان الأفكار اللى فى مخى نفسها ولا مظبوطة ولا جميلة، ثانياً الخوف ان محدش اصلاً يقرا البلوج (هنا نلاحظ تناقض بين أولاً و ثانياً، و التناقض دة شئ هنشوف منه كتير فى المستقبل) اما ثالثاً فهى انى بحس بضغط انى لازم اكتب لازم اكتب ما ينفعش ماكتبش امال انا عاملة البلوج ليه لازم اكتب لازم لازم لازم،و دة يؤدى طبعاً الى انى فى الآخر ما بكتبش.
وجهة النظر الثالثة و الأخيرة بتقول انى مشكلتى عقلية، و وجهة النظر تتلخص فى ان أفكارى غير قابلة للنشر، اغلب افكارى يا اما مش ناضجة كفاية، يا اما محتاجة لسة بحث، يا اما مبهمة و مش قادرة احطها فى صيغة كلمات.
و الآن بعد ما استعرضنا سوا تحليل لاسباب فشل كل بلوج بدأته، أحب ابشركم ان كل دة هيتغير ابتداءً من اللحظة دى، بكل بساطة حاقول اللى فى مخى مهما كان مبهم، و حاقول اللى حاسة بيه حتى لو محدش فهمه، و حعمل كل دة باللغة الى حاسة انها تقدر توصل كلامى بافضل صورة، شايفين، الموضوع بسيط معرفش كنت معقداه ليه؟ المهم اسيبكو دلوقتى تستمتعوا (او ما تتستمتعوش على حسب) ببلوجى الخامس... و ربنا معاكم

مع حبى (بجد) أنديرا